Tozsoran alarkən nələrə diqqət etməli

Ən çox istifadə olunan məişət əşyalarından biri, təmiz və gigiyenik mühiti qurmaqda xanımların ən əsas yardımçısı olan tozsoranların seçimi heç də onların istifadəsi qədər rahat deyil. Bu məqaləmizdə tozsoran seçimi zamanı nə kimi göstərici və xüsusiyyətlərə diqqət edilməli olduğundan danışacağıq. Beləliklə, diqqət etməli olduğunuz bəzi özəlliklər:

Demək olar ki, bütün evlərdə parket, xalça və digər örtüklərin, həmçinin, təmizlənməli olan künclərin olduğunu nəzərə alsaq, tozsoranda müxtəlif örtüklərin təmizlənməsi üçün fərqli başlıq və fırçaların, həmçinin, küncləri təmizləmək üçün xüsusi başlıqların olması diqqət edilməli məsələdir. Bundan başqa, əgər evinizdə xalça örtük üstünlük təşkil edirsə, altında hərəkət zamanı fırlanan fırçaların olduğu tozsoranlara üstünlük vermək məsləhətdir. Bu tozsoranlar xalça səthdə daha yaxşı təmizləmə edir.

Samsung vacuum cleaner

Seçim etməli olduğunuz digər bir məsələ isə torbalı yozsa torbasız tozsoran versiyalarıdır. Torbasız tozsoranlarda olan ən əsas çatışmazlıq hər təmizlikdən sonra toplanmış zibilin boşaldılmasıdır ehtiyacıdır. Bu baxımdan torbalı tozsoranlar daha rahatdır.

Həmçinin, tozsoranın təmizlik zamanı nə dərəcədə yüksək səs çıxartmasını da alışdan öncə yoxlamaq tövsiyə olunur. Əgər siz sakitliyi sevən və məişət əşyalarının da maksimum dərəcədə az səs çıxararaq işləməsini xoşlayan birisinizsə, bu faktor sizin üçün çox önəçlidir.

Son olaraq isə tozsoranların üç fərqli kateqoriyası haqqında məlumat verək. Seçimi “Kanister” adlanan standard, “şaquli” və “robot” tozsoranlar arasında edə bilərsiniz. Aşağıda hər bir kateqoriyanın əsas müsbət və mənfi göstəriciləri qeyd olunur:

Hal-hazırda daha çox istifadə olunan kanister tipli tozsoranlar döşəmə, pilləkən, mebellərin altı, həmçinin, mebel örtükləri və pərdələrin təmizlənməsində daha yaxşı performans göstərir və şaquli tozsoranlardan daha yüngül və adətən daha səssizdir. Əsas mənfi cəhət isə zibilin toplandığı əsas hissə və sorucu hissədən ibarət olan bu tozsoranların dolab və digər saxlanc yerlərində yerləşdirilməsində çətinliyin olmasıdır. Həmçinin, bu tozsoranlar şaquli tozsoranlardan daha baha olur.

Şaquli tozsoranlar xüsusilə xalça səthlərin təmizlənməsində daha yaxşı nəticə göstərir və dik dura bilən rahat dizaynı onun az yer tutaraq saxlanc yerlərinə (dolaba və s.) rahat yerləşdirməyə imkan verir. Qiymət olaraq da bu tip tozsoranlar daha ucuzdur. Əsas çatışmazlıq isə çəkisinin kanister tipli tozsoranlardan ağır olması və beləliklə də çətin daşınılan olmasıdır. Bu tozsoranlar pilləkən və mebel altlarının təmizliyi üçün o qədər də ideal seçim deyil.

Robot tozsoranların əsas üstünlüyü siz istirahət edərkən onun təmizliyin qeydinə qalmasıdır. Ancaq nəzərə alın ki, robot tozsoranlar digər versiyalarla müqayisədə o qədər də yaxşı “təmizləyici” deyil. Xüsusilə də xalça və buna bənzər səthlər evinizdə çoxdursa, robot tozsoran sizə uyğun seçim deyil.

Domo vacuum cleaner