Baxmağa dəyər televizorlar

Televizor alarkən seçimi nələrə görə etməli

TV texnologiyaları inkişaf etdikcə LED, OLED, 4K Ultra HD və s. kimi bir çox terminlərlə rastlaşırıq. Xüsusilə də son 5 il və ya daha uzun müddət ərzində yeni televizor almamış olanlar üçün bütün bu texniki terminlər çox qarışıq ola bilər. Nəticədə bəlkə də heç vat doğru televizoru seçdiyinizdən əmin ola bilməyəcəksiz. Bəs televizor alarkən hansı kriteriya və göstəricilərə əsasən seçim etməliyik?

Aşağıdakı məqalədə televizor seçimində sizə yardımçı olacaq ən önəmli xüsusiyyətləri qeyd edirik.

Televizorun ölçüsü
Əminliklə demək olar ki, bir vaxtlar evimizin, daha dəqiq desək, televizorun qoyulacağı otağın nə dərəcədə böyük olması hansı televizoru seçməkdə böyük rol oynayırdı. Çünki televizorlar uzunluq, en və hündürlüyə malik (“qutu formalı” deyə bilərik) böyük əşyalar idi. Müasir dövrdə isə televizorların sadəcə iki ölçülü, nazik və çox vaxt divardan asıla bilən, az yer tutan əşyaya çevrilməsi ölçü məsələsinin o qədər də problemli olmaması deməkdir. Ancaq burda bir məsələni nəzərdən qaçırmamalıyıq ki, televizorun ekran ölçüsü onun qiyməti ilə düz mütənasibdir; belə ki, ekran ölçüsü artdıqca qiymət də artacaqdır.
Belə ki, hal-hazırda 24” (61 sm) diaqonal TV-dən 98” (248 sm) diaqonal TV-yə kimi bir çox seçim mövcuddur. Deməli, ilk olaraq büdcənizi təyin etməli və büdcənizə uyğun əldə edə biləcəyiniz ən böyük ekran ölçüsünü seçməlisiniz.

 Sony LCD

Televizorun texnologiyası
Gəlin ilk öncə qısaca televizor texnologiyasının xronologiyasını xatırlayaq. İlk öncə istifadə olunan televizorlar Plazma texnologiyası idi. Növbəti təqdim olunan texnologiya LCD və ardınca da LED televizorlar izləyicilərin ixtiyarına verildi. Məlum məsələdir ki, hər yeni texnologiya özündən əvvəlki ilə müqayisədə çox daha üstün göstəricilərə və keyfiyyətli görüntüyə sahib olurdu. Qeyd edək ki, hal-hazırda satışda olan əksər televizorlar LED texnologiyalıdır. Ən son olaraq isə OLED texnologiyalı televizorlar istehsal olunmağa başlamışdır ki, bunlar digərləri ilə müqayisədə daha üstün və daha bahadır. Əgər LED və OLED televizorları müqayisə edəriksə, görüntü keyfiyyəti, parlaqlıq, baxış bucağı, televizorun nazikliyi kimi göstəricilərin bir çoxunda OLED daha üstündür. Ancaq unutmayın ki, LED televizorların da üstün olduğu müəyyən funksiyalar var və alış zamanı satıcıdan professional məsləhət almaq yaxşı olar.
(Bonus: böyük ehtimalla bir çox hallrda QLED televizorlar haqqında da eşidirsiz..Bu, sadəcə Samsung şirkətinin öz LED televizorlarını fərqləndirmək üçün verdiyi addır).

Toshiba LED TV

Televizorun ekran icazəsi (resolution)
Qısaca tarixi xronologiya.. İlk başlarda ekran icazəsi göstəriciləri, yəni görüntü keyfiyyəti çox aşağı idi. Sonrasında, HDTV-nin istehsalı ilə görüntü keyfiyyətində böyük bir irəliləmə oldu. Nəticədə ekran icazəsi dediyimiz, əslində isə pixel sayını göstərən bu özəllik 307,200 pixeldən 1000,000 pixelə, daha sonra isə 2000,000 pixelə qədər inkişaf etdi. Təqribən 5-6 il öncə isə 4K televizorlar təqdim olunduqda biz 8000,000 pixel görüntü əldə etmiş olduq və ideal görüntü anlayışı yeni bir məna qazandı.
Düşünürük ki, yuxarıda qeyd olunan xronoloji ardıcıllıqdan sizə aydın oldu ki, ekran icazəsi (resolution) artdıqca daha keyfiyyətli görüntü əldə olunduğuna görə qiymət də buna mütənasib olaraq artır. Deməli, bu kriteriyada seçim etmək üçün də siz büdcənizə uyğun ekran icazəsini seçməlisiniz.

Əlavə olaraq 4K televizorlarla bağlı bəzi məsələləri qeyd etməyə dəyər. Hal-hazırda 4K görüntü ilə baxıla biləcək kontent digərləri ilə müqayisədə daha azdır. Ancaq bütün video kontent istehsalçıları 4K keçid etməyə artıq başlamışdır və siz tezliklə onları izləyə biləcəksiniz. Həmçinin, nəzərə alın ki, 4K televizorlar daha köhnə HD videoları da öz göstəricilərinə uyğunlaşdıraraq daha keyfiyyətli göstərir.

(Bonus: Əgər Ultra HD haqqında çox eşidirsinizsə (ki belə olduğunu düşünürük), məlumunuz olsun ki, bu sadəcə 4K üçün digər bir addır).

Samsung Smart TV LED 4K curved